Herri kirola sanferminetan

Sanferminetako eguerditan herri kirol giroa izanen da Iruñeko Foruen Plazan.

"Urtero bezala, herri kiroletako hainbat txapelketa jokatuko dira Iruñeko sanferminetan.

Saio guztiak 12:00etan hasiko dira Foru Plazan

eta tartean, kasik egunero, erakustaldiak ere eginen dira.

Uztailaren 8an

Nafarroako Arpana Txapelketak jokatuko dira,

bai lehenengo mailakoa baita emakumezkoena ere.

Gizonezkoetan ez da eskualdeko ordezkaririk izanen, baina emakumezkoetan,

Berako Nerea Sorondo eta Amaia Garcia txapela mantentzen saiatuko dira.

Kanako enborrarekin aizkora erakustaldia ere eskainiko dute

Jon Rekondok eta Donato Larretxeak.

Uztailaren 9an

Nafarroako Ingude Altxatze Txapelketak jokatuko dira,

gizonezkoena zein emakumezkoena.

Gizonezkoetan, Leitzako Josetxo Urrutia eta

Berako Herri Kirol Taldeko Aritz Izuzkiza izanen dira eskualdeko ordezkariak

eta emakumezkoetan, Iturengo Maika Ariztegi eta Mertxe Ariztegi ahizpak.

XVI. San Fermin Motozerra txapelketa ere jokatuko da

eta Oieregiko Esteban Arrruti izanen da lanean.

Aimar Irigoienen harrijasotze erakustaldia egun horretan izanen dira.

Uztailaren 10ean

Nafarroako hirugarren mailako Aizkora Txapelketaren kanporaketa jokatuko da.

Bi kanaerdiko moztu behar dituzte partehartzaileek.

Tartean izanen dira Zigako Joxean Etxeberria, Beintza-Labaiengo Miguel Angel Etxeberria,

Pello Telletxea eta Joxe Mari Elizondo eta Zubietako Mikel Indakoetxea.

Kañamares anaiek erakustaldia eskainiko dute (zerratokia-aitzurrarekin egurra mozten).

Uztailaren 11n

kadete mailako Nafarroako Arpana Txapelketa jokatuko da.

Basaburua-Baztango Eneko Irigoien eta Andoni Galarregi

eta Antton Irigoien eta Iker Aleman lehian ariko dira.

Kimu mailako proba konbinatu erakustaldia eta aizkora erakustaldia ere eginen dira,

baita haurrendako proba popularra ere.

Uztailaren 12an

Nafarroako harrijasotze txapelketa jokatuko da

eta hiru partehartzaileak eskualdekoak izanen dira:

Leitzako Josetxo Urrutia, Sunbillako Unai Bertiz eta Etxalarko Xabier Ariztegi “Santxin”.

Emakumezkoen Txinga Eramate Txapelketan ere berdin,

hiru partehartzaileak eskualdekoak izanen dira:

Lesakako Xanta Sousa eta Estitxu Almandoz eta Berako Nerea Sorondo.

Nafarroako lasto altxatze txapelketan parte hartuko duten

bi kirolariak ere eskualdekoak izanen dira:

Igantziko Eneko Telletxea eta Amaiurko Lander Landiribar.

Uztailaren 13an

Nafarroako bikotekako aizkolari txapelketa eta

Nafarroako gurdi altxatze txapelketak erabakiko dira.

Bikoteka aizkoran sei enbor kanaerdiko eta sei 60 ontzako moztu beharko dituzte

Floren Nazabal eta Ruben Saralegik, Jon Rekondo eta Ander Erasunek

eta Donato Larretxea eta Juanjo Lopezek. 

Gurdi altxatzen, Leitzako Josetxo Urrutia izanen da eskualdeko ordezkari bakarra.

Inaxio Perurenak erakustaldia eginen du harri jasotzen.

Uztailaren 14an,

azkenik, gizonezkoen Nafarroako txinga eramate txapelketa jokatuko da,

eskualdeko ordezkaritzarik gabe.

Mikel Lasartek motozerra erakustaldia eskainiko du. 

Lasto botatzen eta lasto altxatzen erakustaldia eginen dute".

"Ttipi-Ttapa"                              

2014-7-4                               

(laburpena)